Spår laksevekst i aust og vest
Sjømatanalytikar Paul T. Aandahl i Noregs sjømatråd forventar vekst for norsk laks i marknadane i Asia og USA utover hausten.
Så langt i år er eksportvoluma frå Noreg opp over 50.000 tonn målt i rund vekt, ein auke på 8,6 prosent samanlikna med i fjor, og det er EU-marknaden som har tatt det aller meste av veksten. Men utover hausten trur altså Aandahl at det vil snu og at ein vil sjå ein sterkare vekst i marknadar som Asia og USA.
- Det me såg i starten av året var at det var sterk euro mot norske kroner og dollar. Samstundes reduserte Skottland sin produksjon og Færøyane leverte mindre. Det har gjort at Noreg har tatt marknadsandelar i Europa i år, fortel Aandahl til IntraFish.
Sterk vekst i Russland
Han seier vidare at dersom ein ser på fastlands EU så er det totale laksevolumet opp med omtrent 7 prosent, medan verdien målt i euro er omtrent på same nivå som i fjor.
- Det var også i tråd med forventningane med prisane me har i dag. Etterspurnadsveksten flatar ut, fortel han.
Den enkeltmarknaden globalt som for tida har svært sterk vekst, er Russland. Ein marknad Noreg er utestengt frå.
Tal frå Noregs sjømatråd viser at importen av atlantisk laks til Russland til og med april i år auka med 53 prosent til 29.366 tonn (rund vekt). 18.957 tonn kom frå Chile, ein auke på 85 prosent, medan Færøyane leverte 8.671 tonn, som var opp 43 prosent samanlikna med 2017. Frå Kviterussland vart det importert 1.615 tonn, noko som var ein nedgang på 41 prosent samanlikna med i fjor.
- Me ser ein sterk vekst i etterspurnaden i Aust-Europa, men mykje av den er relatert til Russland. Også i Asia er det sterk etterspurnadsvekst, men det er chilensk laks som har tatt det meste av den veksten, seier Aandahl.
Sterkare etterspurnad enn venta
Men når voluma frå Chile utover hausten går ned, er det duka for norsk laksevekst.
- I starten av året fall eksporten frå Noreg til USA på grunn av dollarkursen. No har styrkeforholdet mellom dollar og euro jamna seg ut igjen, og norsk laks på full fart opp. Me forventar framleis vekst i voluma frå Noreg og god produksjon, men globalt reknar me med at veksten frå Chile stoppar opp og konkurransen for norsk laks blir mindre, seier Aandahl.
Kva som vil skje med lakseprisen framover, ønskjer han ikkje å spekulere i offentleg.
- Me har ein prismodell som me brukar, men eg vil ikkje spekulere i kva prisen blir. Så langt i år har volumet vore større enn det me hadde lagt inn i modellen, og då har me òg fått litt lågare pris enn venta. Totalverdien har derimot vore høgare, og det betyr at etterspurnaden er litt høgare enn venta, seier han.
Aure blir meir lik laksen
Men det er ikkje berre voluma av atlantisk laks som veks i Noreg. Eksporten av fersk aure er så langt i år opp over 50 prosent til 16.590 tonn til ein snittpris som ligg litt over laksen.
- Når det gjeld aure var 2017 eit veldig svakt år. I 2016 var det høg eksport til låg pris i forhold til laks, medan det i 2017 var høg pris og lågt volum. No er det meir normal produksjon igjen. Generelt er auremarknaden blitt meir lik laksen. Det er ein ferskmarknad og fryst aure er blitt ei nisje. I tillegg er det fleire marknader å eksportere til. Ingen dominerer på same måte som Russland og Japan har gjort tidlegare. Det ligg store moglegheiter i aure, men det ein ikkje har klart er å få ut premium pris når det er så låge volum som det trass alt er, seier han.
---
Hold deg oppdatert på hva som skjer i norsk og internasjonal oppdrettsnæring – følg oss på Facebook, Linkedin og Twitter, eller abonner på vårt daglige nyhetsbrev.
